Kur dikush në Prishtinë, Prizren apo Pejë shkruan në telefon "dentist afër meje", "restorant" ose "servis veturash", Google shfaq së pari një hartë me tre biznese. Ata që dalin aty marrin pjesën më të madhe të telefonatave. Ata që nuk dalin, shpesh as nuk e dinë që i humbën ato klientë.
Lajmi i mirë: të dalësh në Google Maps është falas. Ju duhet vetëm një profil i rregullt në Google Business Profile (dikur quhej Google My Business).
Çfarë është Google Business Profile?
Është kartela e biznesit tuaj në Google: emri, adresa në hartë, numri i telefonit, oraret, fotot, website-i dhe vlerësimet me yje. Shfaqet në Google Search dhe Google Maps, dhe klienti mund t'ju telefonojë ose të marrë udhëzime me një klikim.
Për shumë biznese lokale në Kosovë, ky profil sjell më shumë telefonata sesa vetë website-i.
Hapat për ta krijuar profilin
- Hapni business.google.com dhe hyni me llogarinë Google të biznesit (jo me llogarinë personale të një punonjësi që mund të largohet).
- Shkruani emrin e saktë të biznesit, ashtu siç shkruhet në tabelë. Mos shtoni fjalë kyçe si "Dentist më i mirë Prishtinë" në emër, sepse Google mund ta pezullojë profilin.
- Zgjidhni kategorinë kryesore me kujdes. Kjo është faktori më i rëndësishëm se për çfarë kërkimesh do të dilni. Më pas mund të shtoni edhe kategori dytësore.
- Vendosni adresën dhe pinin në hartë. Nëse shërbeni te klientët (p.sh. instalime, transport) dhe nuk keni lokal për vizita, zgjidhni zonën e shërbimit dhe fshehni adresën.
- Shtoni telefonin dhe website-in. Nëse nuk keni website, mund të lidhni faqen e Instagramit, por një website i vërtetë ndërton më shumë besim (shihni Website apo vetëm Instagram?).
- Verifikoni biznesin (shpjegimi më poshtë).
Si funksionon verifikimi
Google zgjedh vetë metodat që ju shfaqen. Sipas Google, mund të jenë:
- Video: filmoni hyrjen, tabelën dhe një provë që e menaxhoni biznesin. Google e rekomandon kur ofrohet.
- Telefon ose SMS: kodi vjen në numrin e biznesit.
- Email.
- Thirrje video e drejtpërdrejtë me një përfaqësues, gjatë orarit të punës.
- Kartolinë me postë me kod 5-shifror. Sipas Google, zakonisht arrin brenda 14 ditëve dhe kodi skadon pas 30 ditësh.
Pas dërgimit, Google mund ta shqyrtojë profilin deri në 5 ditë pune. Mos ndryshoni emrin, adresën apo kategorinë ndërsa pritni verifikimin, sepse kjo mund ta rinisë procesin.
Si të dilni më lart se konkurrenca
Google rendit profilet lokale sipas tre gjërave: sa i përshtatshëm është profili për kërkimin, sa afër është klienti, dhe sa i njohur e i besueshëm është biznesi. Afërsinë nuk e kontrolloni, por pjesën tjetër po:
- Plotësoni çdo fushë: oraret (edhe për festat), shërbimet, përshkrimin, atributet.
- Fotografi reale dhe cilësore: lokali nga jashtë, brenda, ekipi, puna. Profili me foto të mira duket i gjallë; ai me një logo të vetme duket i braktisur.
- Vlerësime të rregullta: kërkojuni klientëve të kënaqur një vlerësim, me lidhjen direkte që ju jep Google. Përgjigjuni çdo vlerësimi, edhe atyre negativë, me qetësi.
- Postime në profil: oferta, risi, evente. Tregojnë që biznesi është aktiv.
- I njëjti emër, adresë dhe telefon kudo: në website, Facebook, Instagram dhe katalogë. Mospërputhjet e ngatërrojnë Google.
Gabimet më të shpeshta që shohim
- Profili krijuar nga një punonjës i vjetër dhe askush nuk ka më qasje.
- Orari i gabuar, klienti vjen dhe gjen derën mbyllur, pastaj lë një yll.
- Numër telefoni që nuk përgjigjet.
- Asnjë përgjigje ndaj vlerësimeve.
- Kategoria e gabuar, p.sh. "Dyqan" në vend të shërbimit që ofroni.
Pyetje të shpeshta
A kushton diçka Google Business Profile?
Jo. Krijimi dhe menaxhimi i profilit janë falas. Paguani vetëm nëse zgjidhni të bëni reklama me pagesë në Google.
Sa kohë duhet që biznesi të dalë në Google Maps?
Pas verifikimit, profili zakonisht shfaqet brenda pak ditësh. Sipas Google, shqyrtimi mund të zgjasë deri në 5 ditë pune, ndërsa kartolina me postë zakonisht arrin brenda 14 ditëve.
Si mund të dal i pari në Google Maps?
Askush nuk mund ta garantojë vendin e parë. Ndihmojnë kategoria e saktë, profili i plotë, fotot reale, vlerësimet e rregullta dhe informacioni i njëjtë kudo në internet.
A më duhet website nëse kam Google Business Profile?
Nuk është i detyrueshëm, por ndihmon. Website-i i jep Google më shumë informacion për biznesin tuaj dhe klientit më shumë arsye t'ju besojë.
Burimet
- Google Business Profile Help: Verify your business on Google
- Google Business Profile Help: How to add or claim your Business Profile on Google
Nëse doni që profili juaj të ngrihet dhe të mirëmbahet nga ne, bashkë me rrjetet sociale dhe website-in, plotësoni formën më poshtë.